Cha que po gnir attribuieu al concept interessant, ma eir als referents respectivamaing als musicists da nom e da pom, scrivan ils organistuors in üna comunicaziun a las medias. Cha’ls dis da chaunt dessan perque spordscher inavaunt üna plattafuorma per fer experienzas cumünaivlas cun fer musica i’l ram da furmaziuns, lavuratoris, rapreschantaziuns e barats d’idejas. 

L’Inscunter da chaunt a Zuoz, chi ho lö dals 25 fin 27 settember, prevezza püssas pussibilteds per as parteciper. Dirigentas e dirigents, chantaduras e chantaduors, amaturas ed amataurs dal chaunt, indigens e giasts vegnan invidos da piglier part a las spüertas. Tuot las occurrenzas staun suot il credo: Access gratuit a la fuormaziun musicala. Il focus da l’Inscunter da chaunt a Zuoz 2024 es sto Musica e resonanza. La seguond’ediziun da l’Inscunter da chaunt refletta la tematica Musica e Lingua. La via dal pled, da la poesia a la cumposiziun, da l’interpretaziun fin a la performanza musicala vain sclarida cun specialistas da la Svizra e da l’exteriur. Las bgeras occurrenzas sun accessiblas sainza annunzcha. Per duos lavuratoris esa necessari da s’annunzcher, nempe per piglier instrucziun da chaunt/fuormaziun da vusch e per chanter aint il cor ad hoc la sanda. (cdm/pl)