In tuot ot musicantas e musicants da Zuoz fin Samignun han tut part a quist cuors fundamental. «Nus vain fat ün’introducziun teoretica e minchüna ha imprais a far ils movimaints ed a leger partituras. Fin a la fin savaiva minchün star davant üna musica e manar üna prouva», quinta il manader dal cuors Fabio Pola. Il cuors ha dürà da november fin la fin da marz. Las dirigentas ed ils dirigents futurs han eir gnü da diriger tocs da musica dürant las prouvas da las musicas giuvenilas o lura üna jada dafatta culla Filarmonica Avvenire Brusio. Il punct final ha gnü lö quist’eivna dürant üna prouva culla Società da musica Zernez, ingio cha mincha partecipanta e mincha partecipant ha surgni la lezcha da diriger üna chanzun cha la musica da Zernez ha sunà l’eivna passada dürant il concert annual. A la fin han lura las partecipantas ed ils partecipants surgnü üna conferma d’avair absolt cun bravura il cuors fundamental da dirigents. «Eu sun fich cuntaint cullas prestaziuns. Quai es enorm che grond success cha las partecipantas ed ils partecipants han fat», quinta Fabio Pola chi ha gnü grond plaschair da quist prüm cuors fundamental. El spera uossa cha quistas nouvas dirigentas e quists nouvs dirigents survegnan eir la pussibiltà d’exercitar e surtour respunsabilità illas musicas. «E lura scha’l interess es amo avantman, pudaina cuntinuar in ün on cul prossem cuors», s’allegra il musicist da professiun ed el suottastricha l’importanza da quist cuors ed eir dals cuors futurs per l’avegnir da las societats da musica. Cha la mancanza da dirigentas e dirigents saja adüna ün tema actual illas societats da musica. Cha perquai saja eir fich important da spordscher cuors da dirigent in tuot la regiun. 

Las partecipantas ed ils partecipants dal cuors fundamental da dirigent sun: Simon Prinz, Giuliana Magni, Orlando Bass, Serafin Caprez, Prisca Angerer, Claudio Regli e Jon Martin Heinrich e Fadri Caprez. 

Text: Nicolo Bass